လာမယ့်ဆောင်းရာသီ 


မလုံခြုံမှုမီးခိုးများဟာ

အူနေတယ်


လေထု ပွန်းပဲ့

ရဟတ်များလည်ပတ်လျက်

ခြောက်ကပ်လယ်ယာမြေပေါ်

စိုစွတ်နေတဲ့သွေးစ

အသားစ

အရိုးစ


အပူချိန်ဟာ

အိမ်ခေါင်မိုးတွေဆီကနေ

ဖြာကျ


တခါတခါ

ကလေးတယောက်ရဲ့ငိုသံ


တခါတခါ

အမယ်အိုတယောက်ရဲ့ညည်းသံ


“စစ်ဖြစ်နေမှတော့

အချစ်စစ်နဲ့လည်းဘယ်တွေ့နိုင်ပါ့မလဲ” 

လူငယ်တယောက်က အံကြိတ်ပြီးပြောတယ်


“ခွေးမသားတွေ

ခွေးကျွေးတောင်မစားဘူး” တဲ့

အဖိုးအိုတယောက်က

တောက်ခေါက်တယ်


ဆေးမရှိတဲ့ရောဂါနဲ့တူတဲ့

လမ်းကမှားနေတယ်


ဆောင်းဝင်တော့မယ်

အချစ်ထက်ပိုပြီး

ဘယ်မီးဖိုက နွေးပါ့မလဲ


နာကျင်မှုကိုသာ

လှုကြ ။     ။

#ကြည်ဇော်အေး