ခင်တို့မောင် ဒီမှာရှိတယ်

ခင်ဟာ
မောင့်ရဲ့မျက်မှန်ကလေးပါ။
ခင်မရှိရင်
မောင်ဘာကိုမှ
ပြတ်ပြတ်သားသား ဝေမခွဲနိုင်ဘူးကွယ်။

ခင်ဟာ
မောင့်ရဲ့နာရီကလေးပါ။
ခင်မရှိရင်
မောင်ဘာကိုမှ
တိတိကျကျ မမှန်းဆနိုင်ဘူးကွယ်။

ခင်ဟာ
မောင့်ရဲ့ဖောင်တိန်ကလေးပါ။
ခင်မရှိရင်
မောင်...
အလုပ်မလုပ်နိုင်ဘူးကွယ်။

ခင်ဟာ
မောင့်ရဲ့စာအုပ်တွေပါ။
ခင်မရှိရင်
မောင်...
အားငယ်တယ်ကွယ်။

ခင်ထွက်သွားတဲ့နေ့ကစပြီး
မျက်စိသူငယ် နားသူငယ်
ကျန်ရစ်ခဲ့တဲ့မောင့်ကို
ညှာတာထောက်ထားတယ်ဆိုရင်
အချိန်မနှောင်းမီ ပြန်လှည့်ခဲ့ပါချစ်သူ။

-မင်းလူ